កាកបាទក្រហមកម្ពុជា ផ្តល់អំណោយសង្គ្រោះបន្ទាន់ដល់គ្រួសាររងគ្រោះដោយខ្យល់កន្ត្រាក់៧៧គ្រួសារ និងគ្រួសារនិវត្តន៍ជន ៥០គ្រួសារ ក្នុងខេត្តកំពង់ស្ពឺ

 

ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺនិងជាប្រធានគណកម្មាធិការសាខាកាកបាទក្រហមកម្ពុជាខេត្ត បានដឹកនាំក្រុមការងារសាខាកាកបាទក្រហមនិងអាជ្ញាធរមូលដ្ឋាន ចុះជួបសំណេះសំណាលនិងសួរសុខទុក្ខប្រជាពលរដ្ឋចំនួន ៧៧គ្រួសារនៅក្នុងក្រុងច្បារមនដែលទទួលរងគ្រោះដោយឧបទ្ទវហេតុខ្យល់កន្ត្រាក់ កាលពីពេលកន្លងទៅ និងគ្រួសារនិវត្តន៍ជនដែលងាយរងហានិភ័យចំនួន ៥០គ្រួសារ នៅសង្កាត់សុព័រទេព ក្រុងច្បារមន ខេត្តកំពង់ស្ពឺ។

 

ឯកឧត្តមបណ្ឌិត ជាម ច័ន្ទសោភ័ណ បានសម្តែងការសោកស្តាយចំពោះការរងគ្រោះដោយបាតុភូតធម្មជាតិខ្យល់កន្ត្រាក់ដែលធ្វើឱ្យប៉ះពាល់ធ្ងន់ធ្ងរដល់ជីវភាពរស់នៅប្រចាំថ្ងៃរបស់បងប្អូន។ក្រោមការគិតគូពីសុខទុក្ខរបស់បងប្អូនដែលរងគ្រោះដោយបាតុភូតធម្មជាតិនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានធ្វើការណែនាំដល់ក្រុមការងាររបស់សាខាកាកបាទក្រហមកម្ពុជាខេត្តកំពង់ស្ពឺឱ្យដឹកនាំស្បៀងអាហារសង្គ្រោះបន្ទាន់ទៅចែកជូនដល់ប្អូនដើម្បីសម្រាលដល់ការលំបាកចំពោះមុខ។ហើយជាមួយនោះ ប្រធានក្រុមការងាររាជរដ្ឋាភិបាលកម្ពុជាចុះជួយខេត្តកំពង់ស្ពឺ ឯកឧត្តមឧបនាយករដ្ឋមន្ត្រី ហ៊ុន ម៉ានី ក៏បានផ្ញើការសួរសុខទុក្ខនិងណែនាំដល់អាជ្ញាគ្រប់លំដាប់ថ្នាក់ឱ្យចុះពិនិត្យនិងតាមដានស្ថានភាពរស់នៅជាក់ស្តែងរបស់បងប្អូនក្រោយរងផលប៉ះពាល់ផងដែរ និងរួមគ្នាគិត រួមគ្នាដោះស្រាយធ្វើយ៉ាងណាកុំឱ្យបងប្អូនរងគ្រោះដោយដាច់ស្បៀងបន្ថែមទៀត។

 

នៅក្នុងឱកាសសំណេះសំណាលនោះដែរ ឯកឧត្តមបណ្ឌិត ជាម ច័ន្ទសោភ័ណ ប្រធានគណកម្មាធិការសាខាកាកបាទក្រហមខេត្ត ក៏បានបញ្ជាក់ផងដែរថា ការគិតគូទាន់ពេលវេលាចំពោះបងប្អូនដែលរងគ្រោះ គឺស្តែងបង្ហាញឱ្យឃើញច្បាស់ពីការខ្វល់ខ្វាយរបស់ថ្នាក់ដឹកនាំ ពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាដែលជានិច្ចកាលសម្តេចតែងតែណែនាំដល់ក្រុមការងារសាខា អនុសាខាតាមបណ្តារាជធានី ខេត្ត ក្រុង ស្រុកឱ្យចុះជាប់ជាមួយប្រជាពលរដ្ឋ និងដោះស្រាយបន្ទាន់រាល់ពេលពលរដ្ឋជួបការលំបាក និយាយជារួមទីណាមានទុក្ខលំបាក ទីនោះគឺត្រូវមានក្រុមការងារកាកបាទក្រហមកម្ពុជា ។

 

ទន្ទឹមនោះ ឯកឧត្តមបណ្ឌិត ជាម ច័ន្ទសោភ័ណ ក៏បានណែនាំទៅដល់បងប្អូនប្រជាពលរដ្ឋឱ្យបង្កើនការប្រុងប្រយ័ត្នខ្ពស់ចំពោះសុខសុវត្ថិភាពផ្ទាល់ខ្លួន គ្រាដែលរដូវវស្សាបានឈានចូលមកដល់។ភ្លៀង ផ្គររន្ទះ ខ្យល់កន្ត្រាក់និងអាចកើតមានឡើងជាយថាហេតុ ស្របពេលដែលមានការជូនដំណឹងរបស់ក្រសួងធនធានទឹកនិងឧតុនិយម ដូច្នេះសូមបងប្អូនធ្វើការទំនាក់ទំនងឱ្យបានពេលវេលាជាមួយអាជ្ញាធរគ្រប់លំដាប់ថ្នាក់ឬសមត្ថកិច្ចពាក់ព័ន្ធដែលនៅជិតបំផុតឱ្យជួយអន្តរាគមន៍ក្នុងករណីជួបឧបទ្ទវហេតុគ្រោះធម្មជាតិ។

 

គួរបញ្ជាក់ផងដែរសម្ភារៈផ្តល់ជូនក្នុង ១គ្រួសារទទួលបាន ៖ អង្ករ ២៥គីឡូក្រាម,មី ២កេស,ត្រីខ ១យួរ,ប្រេងឆា ១ដប,ទឹកត្រីទឹកស៉ីអ៊ីវ ១យួរ,និងថវិកា ៤០,០០០រៀល ។