វគ្គបណ្តុះបណ្តាល ជំនាញបច្ចេកទេសសារព័ត៌មាន ពង្រឹងសមត្ថភាពអ្នកសារព័ត៌មានឆ្លើយតបយុគសម័យឌីជីថល បានបើកដំណើរការក្រោមអធិបតីភាពឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន

 

កម្មការអភិវឌ្ឍន៍មូលធនមនុស្សក្នុងវិស័យព័ត៌មាន និងសោតទស្សន៍ នៃក្រសួងព័ត៌មាន បានបើកវគ្គបណ្តុះបណ្តាល ស្តីពី «ជំនាញបច្ចេកទេសសារព័ត៌មាន» រយៈពេល៥ថ្ងៃ ជូនដល់មន្ត្រីជំនាញបច្ចេកទេស និងអ្នកសារព័ត៌មាន ចំនួន ១០៥នាក់  ក្នុងគោលបំណងពង្រឹងសមត្ថភាពវិជ្ជាជីវៈ និងបង្កើនប្រសិទ្ធភាពការងារផ្សព្វផ្សាយព័ត៌មាន ឱ្យកាន់តែមាន គុណភាព សុក្រឹត្យ និងទាន់សម័យ ស្របតាមបរិបទបច្ចេកវិទ្យាឌីជីថលនាពេលបច្ចុប្បន្ន ។

 

វគ្គបណ្តុះបណ្តាលនេះបានប្រារព្ធឡើងក្រោមអធិបតីភាពឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ដោយមាន សិក្ខាកាមមកពី អគ្គលេខាធិការដ្ឋាន គ្រប់អគ្គនាយកដ្ឋាននៃ ក្រសួងព័ត៌មាន គ្រប់មន្ទីរព័ត៌មានរាជធានី-ខេត្ត ស្ថាប័នពាក់ព័ន្ធ និងអ្នកសារព័ត៌មានដែលមានអាជ្ញាបណ្ណ ទទួលស្គាល់ដោយក្រសួងព័ត៌មាន នាមណ្ឌលបណ្តុះ បណ្តាល និងវិក្រឹតការវិជ្ជាជីវៈសារព័ត៌មាន ទីស្តីការក្រសួង ។

 

ឯកឧត្តមបានគូសបញ្ជាក់ថា វគ្គបណ្តុះបណ្តាលនាពេលនេះ គឺជាផ្នែកមួយដ៏សំខាន់ក្នុងការលើក កម្ពស់គុណភាព វិស័យព័ត៌មាន និងសារព័ត៌មាននៅកម្ពុជា ។  តាមរយៈការចែករំលែកបទពិសោធន៍ និងចំណេះដឹងពីសំណាក់គ្រូ បង្គោល សិក្ខាកាមទាំងអស់នឹងទទួលបាននូវជំនាញ ថ្មីៗ ពិសេសលើការសរសេរព័ត៌មាន ការផលិតព័ត៌មាន ឌីជីថល ការសម្ភាសន៍ ការថតរូប និងវីដេអូ ការផ្ទៀងផ្ទាត់ ព័ត៌មាន និងការប្រើប្រាស់បច្ចេកវិទ្យា ទំនើបក្នុងការងារ សារព័ត៌មាន ។

 

ឯកឧត្តមបញ្ជាក់បន្តថា ក្រសួងព័ត៌មាននឹងបន្តយកចិត្តទុកដាក់លើការអភិវឌ្ឍធនធានមនុស្សក្នុងវិស័យព័ត៌មាន និងការពង្រឹងសមត្ថភាពអ្នកសារព័ត៌មាន ដើម្បីឱ្យវិស័យនេះកាន់តែមានវិជ្ជាជីវៈ សីលធម៌ និងឆ្លើយតបបានទៅនឹង តម្រូវការ នៃសង្គមឌីជីថល និងបរិបទសកលភាវូបនីយកម្ម ។