ទិវាបរិស្ថានជាតិ និងបរិស្ថានពិភពលោក ៥មិថុនា ក្រោមប្រធានបទ «សំណល់សូន្យ» ‎

 

ឯកឧត្តម ហន ភក្តី អភិបាលរង នៃគណៈអភិបាលខេត្តកំពង់ស្ពឺ អញ្ជើញជាអធិបតីភាព ក្នុងពិធីអបអរសាទរទិវា បរិស្ថានជាតិ និងបរិស្ថានពិភពលោក ៥មិថុនា ២០២៦ ក្រោមប្រធានបទ «សំណល់សូន្យ»  ដោយមានការ អញ្ជើញចូលរួមពីលោកប្រធានមន្ទីរបរិស្ថានខេត្ត ប្រធានមន្ទីរអង្គភាពនានាជុំវិញខេត្ត កងកម្លាំងទាំង៣ តំណាង មកពីក្រុង/ស្រុកទាំង៩ សិស្សានុសិស្ស សរុបប្រមាណជាង១៥០០នាក់ ដែលប្រារព្ធធ្វើនៅបរិវេណសួនសម្តេច ព្រះសង្ឃរាជ ជួន ណាត ស្ថិតនៅភូមិទួលគក សង្កាត់ច្បារមន ក្រុងច្បារមន ខេត្តកំពង់ស្ពឺ ។ ‎

 

ក្នុងឱកាសនោះដែរ ឯកឧត្តម ហន ភក្តី អភិបាលរងខេត្ត បានសម្តែងនូវការកោតសរសើរ និងវាយតម្លៃខ្ពស់ចំពោះ មន្ទីរបរិស្ថានខេត្ត អាជ្ញាធរក្រុង/ស្រុក និងគ្រប់ផ្នែកពាក់ព័ន្ធទាំងអស់  ដែលបានសហការគ្នាយ៉ាងសកម្មក្នុងការ រៀបចំដាស់តឿន និងបំផុសស្មារតីជាសាធារណៈឱ្យយល់ដឹងកាន់តែច្បាស់ពីបញ្ហាបរិស្ថាន ។

 

​ឯកឧត្តមបានសង្កត់ធ្ងន់ថា ប្រធានបទ «សំណល់សូន្យ» ក្នុងឆ្នាំនេះ គឺជារូបភាពឆ្លុះបញ្ចាំងយ៉ាងសំខាន់ក្នុងការ ជំរុញឱ្យមានការកាត់បន្ថយ ការប្រើប្រាស់ឡើងវិញ និងការកែច្នៃកាកសំណល់ ដើម្បីឈានទៅរកការគ្រប់គ្រង សម្រាមប្រកបដោយនិរន្តរភាព និងការលុបបំបាត់សំណល់ឱ្យអស់ពីសហគមន៍ ។

‎

‎ជាមួយគ្នានោះដែរ ឯកឧត្តមអភិបាលរងខេត្ត បានដាក់ទិសដៅណែនាំដល់ មន្ទីរបរិស្ថានខេត្ត ត្រូវសហការជាមួយ មន្ទីរការងារ និងបណ្តុះបណ្តាលវិជ្ជាជីវៈខេត្ត ចុះធ្វើការផ្សព្វផ្សាយ និងអប់រំណែនាំដល់ម្ចាស់រោងចក្រ សហគ្រាស ព្រមទាំងបងប្អូនកម្មករ កម្មការិនីទាំងអស់ ឱ្យយល់ដឹងកាន់តែច្បាស់ពីការគ្រប់គ្រងសំណល់រឹង-រាវ ការញែក សម្រាម និងការថែរក្សាអនាម័យបរិស្ថាននៅតាមខ្សែច្រវាក់ផលិតកម្ម និងជុំវិញបរិវេណរោងចក្រ ដើម្បីធានា បាននូវបរិស្ថានការងារល្អ និងមិនមានការបង្ហូរ ឬបោះចោលសំណល់ពាសវាលពាសកាល ។

 

គួរបញ្ជាក់ផងដែរថា នៅក្នុងពិធីអបអរសាទរនេះក៏មានការដើរក្បួន និងសកម្មភាពរួមគ្នាប្រមូលសម្រាម សម្អាត អនាម័យនៅតាមទីសាធារណៈ ដើម្បីជាការដាស់ស្មារតីដល់ប្រជាពលរដ្ឋទូទៅ ឱ្យចូលរួមថែរក្សាអនាម័យ បរិស្ថានទាំងអស់គ្នាផងដែរ ៕

‎