អាជ្ញាធរខេត្តកំពង់ស្ពឺ ចុះពិនិត្យ និងប្រជុំដោះស្រាយករណីសិប្បកម្មផលិតមួក បង្កផលប៉ះពាល់ដល់បរិស្ថាន ក្នុងក្រុងច្បារមន

 

លោកបណ្ឌិ តូច ប៉ូលីវា អភិបាលរងខេត្តកំពង់ស្ពឺ តំណាងឯកឧត្តមបណ្ឌិតអភិបាលខេត្តកំពង់ស្ពឺ បានដឹកនាំក្រុម ការងារមន្ទីរ-អង្គភាពជំនាញពាក់ព័ន្ធ អាជ្ញាធរក្រុងច្បារមន អាជ្ញាធរឃុំ-ភូមិ និងភាគីម្ចាស់សិប្បកម្ម ចុះពិនិត្យខ្សែ ចង្វាក់ផលិតកម្មជាក់ស្តែង និងបានបើកកិច្ចប្រជុំពិភាក្សាដោះស្រាយករណីទីតាំងសិប្បកម្មផលិតមួក  ដែលស្ថិត នៅភូមិរការធំ សង្កាត់រការធំ ក្រុងច្បារមន ខេត្តកំពង់ស្ពឺ ។

 

ក្នុងឱកាសនោះលោកបណ្ឌិតប្រធានអង្គប្រជុំបានលើកឡើងថា សិប្បកម្មនេះមាន ០២ ទីតាំង គឺទីតាំងដុតចំហេះ និងទីតាំងខ្សែចង្វាក់ផលិតកម្មចេញផលិតផលសម្រេច។ ដើម្បីមានមូលដ្ឋានច្បាស់លាស់ក្នុងការពិនិត្យលទ្ធភាព អនុញ្ញាតឱ្យបើកដំណើរការឡើងវិញ តំណាងមន្ទីរ-អង្គភាពជំនាញបានលើកឡើងនូវចំណុចខ្វះខាត និងមតិ យោបល់សំខាន់ៗដើម្បីពិភាក្សាក្នុងនោះមានដូចជា៖ ការប្រើប្រាស់កម្លាំងពលកម្មនៅក្នុងសិប្បកម្មនេះ ពុំទាន់ បានស្នើសុំចុះបញ្ជីនៅមន្ទីរ ឬក្រសួងការងារនៅឡើយទេ ។

 

សិប្បកម្មនេះមិនទាន់មានលិខិតបទដ្ឋានគាំពារបរិស្ថាន ឬអនុវត្តតាមលិខិតណែនាំឡើយ ។   ដូច្នេះម្ចាស់សិប្ប កម្មត្រូវបំពេញកាតព្វកិច្ចបង់ប្រាក់ពិន័យកន្លងមកចំនួន ២០លានរៀល និងត្រូវរៀបចំស្នើសុំលិខិតគាំពារ បរិស្ថានឱ្យបានត្រឹមត្រូវ ។  ក្រុមការងារអន្តរក្រសួងបានចុះត្រួតពិនិត្យកាលពីថ្ងៃទី១៧ ខែកក្កដា ឆ្នាំ២០២៦ និង បានរកឃើញចំណុចខ្វះខាតផ្នែកផ្លូវច្បាប់ និងបច្ចេកទេសជាច្រើនដូចជា៖ ខ្វះលិខិតអនុញ្ញាតបង្កើតសិប្បកម្ម, ប្លង់សុវត្ថិភាពឧស្សាហកម្ម, វិញ្ញាបនបត្រអនុញ្ញាតដំណើរការ, លិខិតត្រួតពិនិត្យលក្ខណៈបច្ចេកទេសឡចំហាយ /ម៉ាស៊ីនបណ្ណែនខ្យល់, និងលិខិតអនុញ្ញាតបញ្ចេញសំណ

ល់ជាដើម ។

 

ប្រធានអង្គប្រជុំបានឱ្យដឹងទៀតថាអាជ្ញាធរមូលដ្ឋាន និងសមត្ថកិច្ចបានលើកឡើងស្របគ្នាថា សិប្បកម្មនេះពិតជា បានភាយក្លិនផ្សែងដុតក្រណាត់ បង្កផលប៉ះពាល់យ៉ាងធ្ងន់ធ្ងរដល់បរិស្ថាន និងសុខភាពប្រជាពលរដ្ឋរស់នៅជុំវិញ ពិសេសចាស់ជរា កុមារ និងស្ត្រីមានផ្ទៃពោះ។ រដ្ឋបាលក្រុងច្បារមន និងមន្ទីរពាណិជ្ជកម្ម៖បានបញ្ជាក់ថា កន្លង មកធ្លាប់បានណែនាំឱ្យកែសម្រួល ប៉ុន្តែម្ចាស់សិប្បកម្មកែប្រែបានតែលើកដំបូលឡចំហាយប៉ុណ្ណោះ ហើយក៏ពុំ ទាន់មានលិខិតអនុញ្ញាតចុះបញ្ជីពាណិជ្ជកម្មត្រឹមត្រូវតាមច្បាប់នៅឡើយទេ។

 

ទីចាត់ការអន្តរវិស័យសាលាខេត្ត បានស្នើឱ្យម្ចាស់សិប្បកម្មបញ្ឈប់សកម្មភាពដុតក្រណាត់ដែលបង្កផលប៉ះពាល់ និងត្រូវរៀបចំឯកសារស្នើសុំច្បាប់អនុញ្ញាតឱ្យបានត្រឹមត្រូវ។ ជាការឆ្លើយតប លោក លិន ឡាយ ម្ចាស់សិប្បកម្ម ផលិតមួក បានទទួលស្គាល់នូវចំណុចខ្វះខាតក្នុងការគ្រប់គ្រងឡចំហាយតាមស្តង់ដាបច្ចេកទេស និងការបំពេញ នីតិវិធីច្បាប់ ដោយរូបលោកបានស្នើសុំរយៈពេល ០៤ខែ ដើម្បីរៀបចំបែបបទផ្លូវច្បាប់ឱ្យបានរួចរាល់។

 

ជាលទ្ធផល និងវិធានការសម្រេចក្នុងអង្គប្រជុំ បន្ទាប់ពីបានពិភាក្សា និងប្រមូលព័ត៌មានគ្រប់ជ្រុងជ្រោយ អង្គប្រជុំ បានសម្រេចដាក់ចេញនូវវិធានការចំនួន ០៦ ចំណុចដូចខាងក្រោម៖ 1. ទុកថិរវេលា ០៣ខែ ជូនភាគីម្ចាស់សិប្ប កម្ម ដើម្បីរៀបចំបំពេញបែបបទ និងនីតិវិធីច្បាប់ផ្សេងៗឱ្យបានត្រឹមត្រូវ។  2. មន្ទីរជំនាញពាក់ព័ន្ធ ត្រូវយក សំណល់សំណាកផេះ ទៅធ្វើការពិសោធន៍តាមបច្ចេកទេស។  3. មន្ទីរ-អង្គភាពជំនាញ ត្រូវចុះតាមដាន និង ពិនិត្យការអនុវត្តរបស់សិប្បកម្មជារៀងរាល់ ១ខែម្តង។

4. រដ្ឋបាលក្រុងច្បារមនត្រូវស្រាវជ្រាវរកលិខិតអនុញ្ញាតសាងសង់សំណង់ និងចុះកំណត់ព្រំដីឱ្យបានច្បាស់លាស់។

5. ម្ចាស់សិប្បកម្ម ត្រូវប្រើប្រាស់ធ្យូង ជំនួសឱ្យការដុតសំណល់ឧស្សាហកម្មជាបណ្តោះអាសន្ន។

6. រដ្ឋបាលក្រុង ត្រូវចាត់អធិការដ្ឋាននគរបាលក្រុង ចុះត្រួតពិនិត្យលើការងារគ្រប់គ្រង និងបង្ការអគ្គិភ័យ។