លោក ហួន ច័ន្ទថុន បង្ហោះសំណេថា សម្រាប់ថ្ងៃទី១ ព្រឹត្តិការណ៍សមរាត្រី នៃប្រាសាទអង្គរវត្ត បានទាក់ ទាញភ្ញៀវទេសចរជាតិ អន្តរជាតិប្រមាណ ជាង២ម៉ឺននាក់ មកទស្សនា

 

តាមរយៈសំណេមួយដែលបានបង្ហោះនៅលើផេកផ្លូវការ របស់លោក ហួន ច័ន្ទថុន  នៅថ្ងៃទី២១  ខែមីនា ឆ្នាំ ២០២៦នេះ  គេឃើញមានខ្លឹមសារថា  នៅថ្ងៃនេះ​តាមរយៈបណ្តាញព័ត៌មានទំនាក់ទំនងសង្គម បានបង្ហាញ ថា ‎ព្រឹត្តិការណ៍ព្រះអាទិត្យរះចំកំពូល កណ្ដាល នៃប្រាសាទអង្គរវត្ត ឬសមរាត្រី  សម្រាប់ថ្ងៃដំបូង នៅថ្ងៃទី២១ ខែមីនានេះ បានទាក់ទាញភ្ញៀវ ទេសចរជាតិ អន្តរជាតិប្រមាណ ២០.៦៥០នាក់ មកទស្សនានិងផ្ដិតយករូប ភាពដ៏ល្អឯក គ្មានពីរនៅលើលោក ចំកំពូលកណ្ដាលនៃប្រាសាទអង្គរវត្ត  ដើម្បីរក្សាទុកតាមគោលបំណង របស់ពួកគាត់ ។ នៅក្នុងចំណោមភ្ញៀវ ទេសចរជាង២ម៉ឺននាក់នេះ ក្នុងនោះភ្ញៀវបរទេស ២.៣១៦នាក់ និង ទេសចរជាតិប្រមាណ ១៨.៦៤០នាក់។

‎

‎

សំណេលោក ហួន ច័ន្ទថុន បន្តថា ព្រឹត្តិការណ៍ដ៏ល្អឯកប្រចាំឆ្នាំនេះដែរ ភ្ញៀវទេសចរបានបង្ហាញក្ដីរីករាយ និងមានភាពភ្ញាក់ផ្អើល ព្រមទាំងមានមោទនភាពចំពោះព្រឹត្តិការណ៍ដ៏អស្ចារ្យនេះ ជាមួយនឹងភាពស្រស់ស្អាត នៃថ្ងៃរះនៅលើកំពូលប្រាសាទអង្គរវត្ត ដែលប្រទេសដទៃទៀតមិនអាចប្រៀបផ្ទឹមបាន។

‎

‎ព្រឹត្តិការណ៍ថ្ងៃរះចំកណ្ដាលប្រាសាទអង្គរ ឬហៅថា សមរាត្រី (Equinox) កើតឡើងចំនួន ២ដង ជារៀងរាល់ឆ្នាំ គឺសមរាត្រីរដូវប្រាំង កើតឡើងនៅថ្ងៃទី២១ ខែមីនា និងសមរាត្រីរដូវវស្សា កើតឡើងនៅថ្ងៃទី២២ ខែកញ្ញា។ សម្រាប់ថ្ងៃទី២១ ខែមីនានេះ ជាសមរាត្រីរដូវប្រាំង នៅចន្លោះថ្ងៃទី ២១ ដល់ថ្ងៃទី ២៣ ខែមីនា ចាប់ពីម៉ោង ៥:០០ ព្រឹក ដល់ ៦:៣០ ព្រឹក ។

 

ខ្លឹមសារសំណេលោក ហួន ច័ន្ទថុន បន្តថា  នេះគឺជាភាពទាក់ទាញមួយពោពេញដោយភាពរីករាយរបស់ ភ្ញៀវជាតិ និងអន្តរជាតិ ដែលមានចំពោះទឹកដី ទេសចរណ៍វប្បធម៌ប្រវត្តិសាស្ត្រខ្មែរ  លើសពីនេះ សកម្មភាព សមរាត្រីពេលនេះ  ក៏ជាជំនឿចិត្តយ៉ាងរឹងមាំ របស់ភ្ញៀវជាតិ និងអន្តរជាតិទាំងអស់ ដែលបានបង្ហាញការគាំ ទ្រលើរាជរដ្ឋាភិបាលកម្ពុជា ថាជាប្រទេស ដែលចង់បានសុខសន្តិភាពពិតប្រាកដ ។ កម្ពុជាមិនចង់បានទឹកដី ប្រទេសណាមួយនោះទេ  កម្ពុជាគ្រាន់ចង់ រក្សាការពារអ្វីដែលជាសម្បត្តិកម្ពុជាមាន ក្នុងឆ្នាំ១៩០៤ ឆ្នាំ១៩០៧ ឲ្យបានគង់វង់ស្ថិតស្ថេរជានិរន្ត ។