អាវុធហត្ថរាជធានីភ្នំពេញ សហការជាមួយអាវុធហត្ថខណ្ឌសែនសុខ បង្ក្រាបទីតាំងលក់បារីអេឡិចត្រូនិកចំនួន ២,៦០០ ប្រអប់ នៅខណ្ឌសែនសុខ

 

កាលពីថ្ងៃទី​១៦ ខែ​ឧសភា ឆ្នាំ​២០២៦​នេះ កម្លាំង​អាវុធហត្ថ​រាជធានី​ភ្នំពេញ សហការ​ជាមួយ​អាវុធហត្ថ​ខណ្ឌ​សែន​សុខ និង​មាន​ការសម្របសម្រួល​ពី​ព្រះរាជអាជ្ញារង នៃ​អយ្យការ​អម​សាលាដំបូង​រាជធានី​ភ្នំពេញ ព្រម​ទាំង​អាជ្ញាធរ​មូលដ្ឋាន បាន​ចុះ​បង្ក្រាប​ទីតាំង​លួច​លក់​ឧបករណ៍​អេឡិចត្រូនិក​សម្រាប់​ជក់​សារធាតុ​គីមី​មួយកន្លែង ស្ថិត​នៅ​ឃ្លាំង​អូ​ស៊ាន គ្រឿង​សង្ហារឹម ភូមិ​ច្រេស សង្កាត់​គោក​ឃ្លា​ង ខណ្ឌ​សែន​សុខ រាជធានី​ភ្នំពេញ​ ។​

 

​ក្នុងបេសកកម្មនេះ សមត្ថកិច្ច​បាន​ដកហូត​វត្ថុតាង​បារី​អេឡិចត្រូនិក​ម៉ាក FISCO ចំនួន ១៣ កេស ស្មើនឹង ២,៦០០ ប្រអប់ និង​ឃាត់ខ្លួន​ម្ចាស់​ទីតាំង​ម្នាក់ ឈ្មោះ XIE SU LONG ភេទ​ប្រុស អាយុ ២៨​ឆ្នាំ ជា​ជនជាតិ​ចិន ដើម្បី​បន្ត​នីតិវិធី​តាម​ផ្លូវច្បាប់ ​។​

 

​អាជ្ញាធរ​បាន​បញ្ជាក់ថា ការ​នាំចូល ចែកចាយ ផ្សព្វផ្សាយ កាន់កាប់ ផលិត និង​ស្តុក​ទុក​ឧបករណ៍​អេឡិចត្រូនិក និង​សារធាតុ​គីមី​សម្រាប់​ជក់ និង​ស៊ី​ស្សា គ្រប់​ប្រភេទ ត្រូវ​បាន​ហាមឃាត់​យ៉ាង​តឹងរឹង​ ។​ សមត្ថកិច្ច​នឹង​បន្ត​អនុវត្ត​វិធានការ​បង្ក្រាប​ជា​បន្តបន្ទាប់ និង​អំពាវនាវ​ឱ្យ​ប្រជាពលរដ្ឋ​ចូលរួម​សហការ​ផ្តល់​ព័ត៌មាន​តាម​លេខ​បន្ទាន់ ១២៩១ ឬ​តាម​បណ្តាញ Telegram, WhatsApp និង CoolApp លេខ 031 5555 669 ព្រមទាំង​អាច​ផ្ញើ​សារ​ទៅកាន់​ផេក​ហ្វេស​ប៊ុក​ផ្លូវកា​ររបស់​កងរាជអាវុធហត្ថ​រាជធានី​ភ្នំពេញ «Phnom Penh Gendarmerie» បាន​គ្រប់ពេលវេលា​ ។​